Акафіст Собору Галицьких святих

 

Тропар, глас 4

Днесь земля галицкая светло празднует,/ святых своих собор почитающи,/ просияша бо от нея и в нейже угодницы Божии,/ и тако в богохранимей стране нашей, людие, радование,/ и всех верных веселие духовное,/ яко даровашася нам пречестнии пред Богом заступницы// и молитвенницы о душах наших.

Кондак, глас 8

Угодницы Божии, святые земли галицкия,/ предстояще за ны соборне Христу Богу,/ утверждение всем верным будите,// празднующим любовию святую память вашу.

Величання

Величаем вас,/ вси святии земли галицкия,/ и чтим святую память вашу, / вы бо молите о нас// Христа Бога нашего.

 

    Кондак 1

Возбраннаго Воеводы воином славным, освятившим землю Галицкую, на небеси же от Владыки венцы славы приявшим, похвальное сие приносим пение. Вы же, яко имущии дерзновение ко Господу, молите за нас Христа Бога, да зовем вам Радуйтеся, вси святии земли Галицкия, стено необоримая Православия!    

Икос 1

Ангельский собор на небеси радуется в день памяти вашея, святии земли Галицкия, мы же, собравшеся на веселие духовное, ангелом подражающе, зовем радостно:
Радуйтеся, достоблаженный Соборе Святых Галицких,
Радуйтеся, ничтоже на земли паче Христа Бога возлюбившии,
Радуйтеся, друзи Христовы вернии,
Радуйтеся, всеблаженнии наши заступницы,
Радуйтеся, Полче Божественный,
Радуйтеся, Православия звезды пресветлыя,
Радуйтеся, Преславнии угодницы Божии,
Радуйтеся, земли Галицкия Похвало славная,
Радуйтеся, зарею Святыя Троицы просвещеннии,
Радуйтеся, престолу Господа предстоящии,
Радуйтеся, земли нашея цветы благовоннии,
Радуйтеся, рая древеса плодоносная,
Радуйтеся, вси святии земли Галицкия, стено необоримая Православия!   

Кондак 2

Видящи сияние звезд духовных, землю Галицкую озаряющих, благодарение принесем Христу Богу, поюще Тому хвалебную песнь: Аллилуия.

Икос 2

Разуму нашему просвещения у Господа испросите, святии угодницы Божии, да покаемся, и, оттрясше земное пристрастие, в вере истинно Православней утвердимся и радостно возопиим вам:
Радуйтеся, звезды лучезарныя зем-ли Галицкия,
Радуйтеся, святии наши сродницы,
Радуйтеся, наша похвало и утверждение,
Радуйтеся, премудрии святителие,
Радуйтеся, отцы наши преподобнии,
Радуйтеся, подвижницы Богомудрии,
Радуйтеся, святии мученицы,
Радуйтеся, преславнии Христовы исповедницы,
Радуйтеся, на небеса со славою возведеннии,
Радуйтеся, в вечныя обители с лики ангельскими вселеннии,
Радуйтеся, веру истинную сохранившии,
Радуйтеся, противу прелести лукаваго врага ополчившиися,
Радуйтеся, вси святии земли Галицкия, стено необоримая Православия!

 Кондак 3

Силою Вышняго осененнии, святии равноапостольнии Мефодие и Кирилле, прорастили есте плоды веры преобильнии, поюще Богу: Аллилуия. 

Икос 3

Имуще сокровище велие – Святую веру Православную, утвержденную на Руси равноапостольным князем Владимиром, – всему миру просияли есте, святителие Христовы, темже зовем вам:
Радуйтеся, Петре и Павле, иерарси Христовы святейшии,
Радуйтеся, Феогносте, Киприане и Фотие хранителие неустаннии Православия,
Радуйтеся, Амфилохие и Стефане, благочестия светом озарившии верныя,
Радуйся, Петре, во благовестии Христове добле потрудивыйся,
Радуйтеся, мысленная светила церковная,
Радуйтеся, непорочно святую веру сохранившии,
Радуйтеся, Православием, яко звезды, блистающии,
Радуйтеся, непоколеблемии столпы Церкве Христовы,
Радуйтеся, яко финикс, праведностию процветающии,
Радуйтеся, всем сердцем Христа Бога возлюбившии,
Радуйтеся, словесных овец ревностнии пастырие,
Радуйтеся, алтаря Господня благоговейнии предстоятели,
Радуйтеся, вси святии земли Галицкия, стено необоримая Православия!

Кондак 4

Бурю страстей суетнаго мира сего возненавидев, водворилися еста в пустыни, отцы наши Иове и Амфилохие, и процвели еста в обители Почаевстей, яко крины райстии, поюще Богу: Аллилуия.

Икос 4

Слышавше людие ближнии и дальнии, отцы наши преподобнии, яко молитвою вашею мнози, с верою прибегающии к раце мощей ваших, исцеление от недугов приемлют, в Почаев текут и радостно взывают к вам таковая:
Радуйтеся, отцы наши преподобнии,
Радуйтеся, богомудрии Иове и Амфилохие,
Радуйтеся, скорбным сострадателие,
Радуйтеся, врачи недугующих,
Радуйтеся, чудотворцы преславнии,
Радуйтеся, просящим милости подателие,
Радуйтеся, благодать велию от Бога приявшии,
Радуйтеся, подвиги благими душу украсившии,
Радуйтеся, светильницы благочестия,
Радуйтеся, немощей целители скории,
Радуйтеся, елей милости подающии,
Радуйтеся, полцы лукавых духов прогнавшии,
Радуйтеся, вси святии земли Галицкия, стено необоримая Православия!

Кондак 5

Боготечныя звезды явистеся есте, святии земли Галицкия, во стране нашей, наставляя всех на путь спасения и научая спасающему вами Богу православно взывати: Аллилуия.

 Икос 5

Видевше людие пречудное житие твое, Амфилохие преподобне, яко аще и последи лет нам возсиял еси, но древних отец чести сподобился еси, достойно прияв от Бога чудес дарования, того ради научишася пети тебе:
Радуйся, предивный Богу угодниче,
Радуйся, христианом готовый помощниче,
Радуйся, чудотворче изряднейший,
Радуйся, православия защитителю,
Радуйся, грешных приводяй к исправлению,
Радуйся, душ немощных целителю,
Радуйся, явивый житие равноангельное,
Радуйся, лукавых духов прогонителю,
Радуйся, исполнение благих желаний,
Радуйся, наставниче спасения,
Радуйся, украшение праведников,
Радуйся, собеседниче ангелов,
Радуйтеся, вси святии земли Галицкия, стено необоримая Православия!

Кондак 6

Проповедует страна Галицкая труды и подвиги ваша, богомудрии святии земли нашея, и благодарственно вопиет о вас Богу: Аллилуия.

Икос 6

Возсия православней Галицстей земли нашей просвещение совершенных ваших добродетелей и чудес, святии наши сродницы, преподобнии Иове Княгиницкий и Феодосие, благодаряще Господа, давшего вам таковую благодать, к вам, теплым о нас молитвенникам, взываем:
Радуйтеся, небеснии человецы и земнии ангелы,
Радуйтеся, Христовых заповедей исполнителие,
Радуйтеся, делателие винограда Христова,
Радуйтеся, органы Духа Святаго,
Радуйтеся, рабы благии и вернии,
Радуйтеся, светильницы огня невещественнаго,
Радуйтеся, солнца умнаго лучи пресветлии,
Радуйтеся, милость Божию на нас изливающии,
Радуйтеся, наша защито от гнева Божия,
Радуйтеся, в брани духовной помощницы сильнии,
Радуйтеся, в земном странствии отрада и утешение,
Радуйтеся, покаянию нас научающии,

Кондак 7

Хотяй враг спасения рода человече-скаго нарушити мир Церкве нашея, воздвигше еретическое мудрование в людех, да тщатся двум господам работати и забудут православно пети Богу: Аллилуия.

Икос 7

Новаго тя Николая Мирликийскаго и Петра Александрийскаго зрим, экзарше Никифоре славне: яко бо онии, еретическая лжемудрования соборне осудил еси, прелесть их посрамив, и даже до смерти утверждал еси истин-ную Веру Православную, мы же благодарно прославляем Тя:
Радуйся, Никифоре, победоносче славне,
Радуйся, великий ревнителю Православия,
Радуйся, от волков хищных стада Христова оградителю,
Радуйся, громе, поражаяй нечестивых,
Радуйся, жезлом догматов лжемудрствования посрамивый,
Радуйся, любовию к Православию сердца наша возжигающий,
Радуйся, всем ревнителям Право-славия помощь от Господа подавающий,
Радуйся, латинския прелести обличителю,
Радуйся, веры истинной утвердителю,
Радуйся, страдальче доблестный,
Радуйся, непобедимый воине Царя Христа,
Радуйся, Апостольских преданий хранителю,
Радуйтеся, вси святии земли Галицкия, стено необоримая Православия!

Кондак 8

Странники на земли сей есмы, враг присно искушает ны и многи наставляет сети, да не достигнем отечествия небеснаго. Но вы, святии земли Галицкия, яко сокрушивыя того ухищрения, помозите нам, да выну купно с вами поем Богу: Аллилуия.

Икос 8

Вси есте в Бозе, но и нам, на земли сущим, присно помогаете, святии страстотерпцы, всечестне Павле купно с сопружницею Анною, темже верою и любовию вопием вам таковая:
Радуйтеся, всем верным утверждение,
Радуйтеся, молитвы теплии о нас Богу приносящии,
Радуйтеся, о всех злостраждущих Господа умоляющии,
Радуйтеся, на путь спасения нас наставляющии,
Радуйтеся, в вере истинней нас утверждающии,
Радуйтеся, от напастей и бед свобождающии,
Радуйтеся, Благодати Божия нам ходатаи,
Радуйтеся, Божиих дарований нам подателие,
Радуйтеся, врагов спасения посрамители,
Радуйтеся, козней и наветов бесовских разрушители,
Радуйтеся, в чертозе небеснем лику святых сопричтеннии,
Радуйтеся, оружием молитв ваших нас охраняющии,
Радуйтеся, вси святии земли Галицкия, стено необоримая Православия!

Кондак 9

Всякия беды и скорби избави нас, богоносне отче наш Алексие, веры Православныя хранителю и исповедниче, да сподобимся горняго Иерусалима достигнути и купно с тобою воспевати Богу: Аллилуия.

Икос 9

Вития многовещанныя недоумеют достойно воспети мужество ваше, свя-тии священномученицы Александре и Максиме, вземша бо меч духовный – слово Божие, латинския ересе силу вражию низложили еста и веру православную даже до смерти исповедали еста, темже поем вам таковая:
Радуйтеся, посреде ересей, расколов, волнений и бедствий все земное житие проведшии,
Радуйтеся, многая лишения истинной веры ради претерпевии,
Радуйтеся, камени драгии, страну Галицкую украсивии,
Радуйтеся, за Христа Господа убиеннии,
Радуйтеся, заступницы наша неусыпнии,
Радуйтеся, в райских обителех ныне пребывающии,
Радуйтеся, венцы славы от Господа приемшии,
Радуйтеся, стражи Церкве Христовы неустрашимии,
Радуйтеся, путь из тьмы ересей к вере истинней освещающии,
Радуйтеся, теплии молитвенницы, желания верных во благих исполняющии,
Радуйтеся, малодушных ободрение,
Радуйтеся, страждущих утешение,
Радуйтеся, вси святии земли Галицкия, стено необоримая Православия!

Кондак 10

Спасти хотя люди своя, дарова Христос Бог земли Галицстей вас, Соборе славный, да вашими молитвами спасемся, православно поя Богу: Аллилуия.

Икос 10

Стена и крепкое ограждение земли Галицстей есте, святии мученицы Парфение и Иоанне Новый, темже, память вашу светло празднующе, вопием вам:
Радуйтеся, украшение рода человеческаго,
Радуйтеся, животочныя реки, напояющия нас в жажде духовней,
Радуйтеся, добрии кормчии, от бури житейския нас спасающии,
Радуйтеся, на путь правый стопы наша направляющии,
Радуйтеся, узкими враты Царствия Божия достигшии,
Радуйтеся, вечных благ наследницы,
Радуйтеся, в покой Господа своего вшедшии,
Радуйтеся, о спасении нашем благии ходатаи,
Радуйтеся, небоязненнии проповедницы Истины,
Радуйтеся, со избранными на небеси торжествующии,
Радуйтеся, велию благодать от Господа получившии,
Радуйтеся, в молитвах с нами всегда пребывающии,
Радуйтеся, вси святии земли Галицкия, стено необоримая Православия!

Кондак 11

Пение сие похвальное, еже приносим вам, святии благовернии князие Мстиславе и Ярополче, несть довольно похвалению преславных трудов и подвигов ваших: обаче хвалу Богу воссылающе за вся, яже во святых Своих нам являет, Тому поем Аллилуия.

Икос 11

Светозарный Собор святых Галицких восхваляюще, вернии, устранимся злобы, распрей и раздоров, убежим разделений, расколов и несогласий в Православней вере и единодушно воскликнем тако:
Радуйтеся, Православныя веры исповедницы,
Радуйтеся, насадители истиннаго богопочитания,
Радуйтеся, тьмы нечестия обличители,
Радуйтеся, латинския прелести низложители,
Радуйтеся, дивная Духа Святаго жилища,
Радуйтеся, в междоусобие сущим мира проповедницы,
Радуйтеся, злочестия и неприязни искоренители,
Радуйтеся, вернии и мудрии дома Божия строители,
Радуйтеся, кладези глубокие смирения,
Радуйтеся, кимвалы Слова Божия,
Радуйтеся, учители кротости и воздержания,
Радуйтеся, от ересей и расколов ог-раждение,
Радуйтеся, вси святии земли Галицкия, стено необоримая Православия!

Кондак 12

Благодать Господню испросите нам, святии наши сродницы, почитающим с любовию святую память вашу и помозите нам предстательством вашим спасение вечное получити, да вкупе с вами воспоем Богу, дивному во святых Своих: Аллилуия.

Икос 12

Поюще память вашу, святии земли Галицкия, благодарим Бога, даровавшаго нам вас, Соборе чудный, и молимся прилежно: испросите для нас велия милости, да не оскудеет в нас вера святоотеческая, в нейже преуспели есте, да будем же и мы подражатели вам в вере и добродетелех, и тако возможем радостно вопити вам:
Радуйтеся, треблаженнии избранницы Божии,
Радуйтеся, от земли Галицкия просиявшии,
Радуйтеся, явленнии и неявленнии,
Радуйтеся, именованнии и безыменнии,
Радуйтеся, Отечества Небеснаго достигшии,
Радуйтеся, венцы славы от Бога приемшии,
Радуйтеся, молитвами теплыми страну нашу в благочестии утверждающии,
Радуйтеся, братий наших, в расколах и ересех сущих, ко вере Православней обращающии,
Радуйтеся, нивы Христовы добрии делатели,
Радуйтеся, Церкве красото пресветлая,
Радуйтеся, Божие к земли Галицкой благоволение,
Радуйтеся, страны нашея благословение,
Радуйтеся, вси святии земли Галицкия, стено необоримая Православия!

Кондак 13

О святии сродницы наша, земли Галицкия цветы благовоннии, приимите сие наше хвалебное пение и теплым своим к Богу предстательством избавите нас от всякаго зла, от вражды и несогласия, да, с любовию вас чтуще, выну зовем Богу Аллилуия.

 

М О Л И Т В А

 

О святии угодницы Божии, от земли Галицкия миру славно просиявшии; взирая на пречистый ваш образ, смиренно молим вас: своим ходатайством пред Богом вздвигните нас из глубины греховныя, да прекратятся зависть, вражда и раздоры, в нас живущие. Умолите Милостиваго Господа, да покроет множество грехов наших, да соблюдет Церковь Свою святую от неверия, ересей и расколов. Всех же нас да покроет Своею всесильною десницею и да избавит от всяких бед и обстояний и сподобит неосужденными предстати Престолу Господа Славы и  со всеми святыми выну славити пресвятое и великолепое Имя Отца и Сына и Святаго Духа, ныне и присно и во веки веков. Аминь.